CENTRAL VISAYAS- Mas gipakusgan pa sa Police Regional Office 7 (PRO7) ang ilang operasyon batok sa ilegal nga droga subay sa mando ni Chief PNP, PGen Nicolas D. Torre III, nga siguruhon ang seguridad ug kalinaw sa mga komunidad sa tibuok nasud.
Base sa datos sa PRO7, gikan Hulyo 1 hangtod 31 ning tuiga (2025), nakahimo sila og 766 ka mga anti-illegal drug operations. Kini misangpot sa pagkasakmit sa 15,836.61 gramos nga shabu nga nagkantidad og P107.6 milyon.
Gawas pa niini, nadiskobrehan usab sa mga otoridad ang mga tanom nga marijuana nga nagkantidad og P34,564.
Sa maong operasyon, 896 ka mga suspek ang nadakpan isip kabahin sa intelligence-driven nga kampanya sa PRO7 batok sa mga drug syndicates sa Central Visayas.
Gipasiugda ni Police Brigadier General Redrico Atienza Maranan, Regional Director sa PRO7, nga dili sila mopadaug sa hulga sa ilegal nga droga ug ipadayon nila ang paningkamot sa paglimpyo sa rehiyon.
Nanawagan usab ang PRO7 sa publiko nga magpabiling mabinantayon ug motabang sa kapulisan pinaagi sa pag-report sa mga kahina-hinalang lihok o kalihokan.
Pinaagi sa suporta sa komunidad ug padayon nga kampanya sa kapulisan, tumong sa PRO7 nga mahimo nga drug-free ug malinawon ang tibuok Central Visayas.
