Mokabat og P4 bilyones ang gibanabanang danyos sa mga tunghaan sa Northern Cebu nunot sa 6.9 magnitude nga linog.
Kini ang gipaambit ni Department of Education (DepEd) Region 7 Director Salustiano Jimenez, nga basi sa inisyal nga assessment sa buhatan sa DepEd nga kapin sa 500 ka classrooms ang hingpit nga naguba, kapin sa 700 ang nakaangkon og dakong kadaot, ug kapin sa 2,000 ka classrooms ang nakahiagum og gamay nga kadaot.
Namatikdan usab ni Jimenez nga ang gidak-on sa pagkaguba sa mga apektadong lugar hilabi ka taas kung itandi sa Bagyong Odette kaniadtong 2022.
Matud niini nga dili susama kalapad ang kadaot ug nikabat kini og P7 billion ang kantidad sa tibuok rehiyon, ingon man nga sa gagmay nga area kay anaa lang kini sa P4 billion.
Dugang niya nga dili lang mga classroom ang nakaangkon og kadaot sa maong linog kon dili lakip na ang pipila ka division offices sa Northern Cebu.
Samtang, gikumpirmar usab niini ang 12 ka tinun-an ug usa ka magtutudlo ang namatay sa makagun-ob nga linog.
Diin sa 12 ka mga tinun-an, walo gikan sa dakbayan sa Bogo, samtang ang nahibiling upat gikan sa ubang lungsod sa Probinsiya sa Sugbo.
Ingon man nga nahatag na ang pinansyal nga tabang, gikan sa regional office ug personal contributions ngadto sa mga pamilya sa mga biktima.
