MANDAUE CITY, CEBU-Personal nga gihatag ni Philippine National Police Chief PGen. Rommel Francisco Marbil ang PNP Heroism Medal o Medalya ng Kadakilaan ngadto kang Mandaue Police PSSg Orvin Seth Lim Felicio tungod wala kini nagpamilok sa iyang katungdanan, ingon man sa pagpakita og talagsaong kaisog sa dakong risgo sa iyang kaugalingong kinabuhi.
Ang hepe sa kapolisan giubanan ni PBGen. Anthony Aberin, ang Regional Director sa PRO-7 ug ubang kapulisan sa dakbayan, nga mibisita sa Sacred Heart Chapel, V. Jakosalem St., Cogon Ramos, dakbayan sa Sugbo kagahapon, Hulyo 31, 2024 diin gihaya si Felecio.
Ingon man nga mainit nga gitagbo ang mga opisyal sa mga kabanay sa namatay ug gidawat ang “Medalya sa Kadakilaan” isip pag-ila sa halangdon nga serbisyo bisan pa sa iyang kamatayon.
Kahinumduman nga si PSSG Felicio gipusil niadtong Hulyo 27 sa usa ka menor de edad nga gigukod sa pipila ka nagpatrolya nga mga personahe sa BPSO, ug mitabang kini sa paggukod gamit ang iyang motorsiklo.
Dihang naabtan ni Felecio ang suspek, iya kining giestoryahan ug gipangutana kon unsay iyang gibuhat sa dalan ug gipapauli.
Apan sa iyang pag-parking sa iyang motorsiklo nakadungog ang Tanod sa Barangay og buto sa armas ug sa ilang pagresponde sa lugar ilang naabtan ang biktima nga nagbuy-od na daplin sa dalan.
Nakaangkon og duha ka samad sa bala sa managlahing parte sa lawas ang biktima.
Gisuwayan pagdala sa CDRRMO sa tambalanan si Felecio apan patay na kini.
