Mipaabot sa iyang pahalipay si Russian President Vladimir Putin kang US President-elect Donald Trump sa iyang kadaugan sa bag-ohay lang nga 2024 US Presidential elections.
Sa plenary session sa Valdai International Discussion club sa Sochi, Russia, gisubli ni Putin nga andam siyang makigtambayayong sa bisan unsang pangu sa estado nga gisaligan sa mga Amerikano.
Nakadayeg usab si Putin sa kinaiya ni Trump human sa 2 ka pagsulay sa pagpatay sa iyang kinabuhi samtang nangampanya ug gidayeg isip ‘isog nga tawo’.
Andam ang lider sa Russia nga makighisgot kang Trump ingon man si Putin miingon nga ang pag-angkon ni Trump nga makatabang kini sa pagtapos sa gubat tali sa Ukraine ug Russia angayan nga hatagan og pagtagad.
Mahinumduman nga sa panahon sa kampanya ni Trump, balik-balik nga gisulti niya nga mahimo niyang tapuson ang gubat sulod sa usa ka adlaw apan wala niya hisguti sa kung unsang pamaagi.
