Gisaway ni Davao City 1st District Representative Paolo “Pulong” Duterte ang ikalima nga State of the Nation Address (SONA) ni Presidente Ferdinand Marcos Jr.
Sumala ni Duterte, ang tubag sa Presidente dili igo tungod sa mga isyu sa korapsyon ug sa mga kalisdanan nga nasinati sa daghang mga Pilipino.
Matud niini nga maayo unta nga madungog ang pahayag kung kini nagpakita usab sa susama nga kabalaka alang sa katawhang Pilipino, diin samtang naluoy siya sa iyang ig-agaw, nakapangutana si Duterte nga kanus-a usab maluoy si Marcos sa milyon-milyon nga mga Pilipino nga nag-antos sa kakabus, nga nagreklamo bahin sa walay hunong nga pagtaas sa presyo sa pagkaon, taas nga bayranan sa kuryente, ug padayon nga pagkunhod sa bili sa ilang kita.
Kini nagsunod sa pahayag ni Presidente Marcos nga ang kanhi House Speaker Martin Romualdez sa dili madugay mapasakaan og kaso tungod sa giingong mga iregularidad sa mga proyekto sa pagkontrol sa baha.
Apan alang kang Rep. Duterte, kini nga mga pahayag sa Presidente dili igo.
Miingon siya nga gusto sa mga tawo nga mahibal-an ang tibuok kamatuoran ug manubag sa tanan nga nalambigit sa giingong korapsyon, lakip ang mga isyu sa mga pondo sa pagkontrol sa baha, mga pondo sa PhilHealth, ug Maharlika Fund.
Giinsistir usab sa kongresista nga mas importante nga sulbaron ang mga problema nga giatubang sa mga Pilipino sama sa taas nga presyo sa mga palaliton, mahal nga bayranan sa kuryente, ubos nga kita, ug nagkagrabe nga kakabus.
Dugang niya nga ang tinuod nga kahimtang sa nasud dili masukod sa pagpalakpak sa Kongreso, apan sa sulod sa lamesa sa matag pamilyang Pilipino, ang kalidad sa serbisyo sa gobyerno, ug ang pagsalig sa katawhan sa gobyerno.
