Hingpit nang ipatuman sa lalawigan sa Bohol ang roll-out sa P20 per kilo rice program human ang kagamhanang lalawigan kay nakigkoordinar na sa Department of Agriculture sa implementasyon sa maong programa sa baratong bugas sa probinsya.
Sumala pa sa Bohol Provincial Agriculture Office nga mipadala na ang ilang kagamhanan og intensyon sa Department of Agriculture (DA) sa maong lalawigan para sa mga gikatakdang mga benepisyaryo niini.
Dugang pa nga ang DA ug ang National Food Authority (NFA) kay nagpahigayon na og koordinasyon sa maong roll-out para sa programang baratong bugas sa probinsya nga nahisubay sa pasaad sa kasamtangang administrasyon.
Matod pa niini nga i-prioritize nila ang mga residenteng sa mga islang-barangay nga giilang ‘non-rice growing islands’ ug mga lungsuranon niini sa ‘vulnerable sector’ sama sa Senior Citizens, Persons with Disabilities (PWDs), ug mga Solo Parents.
Gipasabot niini nga ang anaa lang sa mainland Bohol ang adunay kapasidad nga makapananom ug maka-ani sa bugas-humay sa ilang lalawigan.
Gani sa pikas bahin, ang National Irrigation Administration – Central Visayas (NIA-7) kay nakapamaligya na og P29 per kilo nga bugas pinaagi sa “Kadiwa ng Pangulo” agricultural fairs niadtong buwan sa Mayo.
