Mihangyo ang kanhi House Speaker nga si Ferdinand Martin Romualdez sa Office of the Ombudsman nga e-inhibit ang imbestigasyon batok kaniya kalabot sa giingong kontrobersiya sa mga proyekto sa flood control, tungod sa giingong “pattern of prejudice” nga naglapas sa due process.
Sa upat ka pahina nga sulat nga gipetsahan Abril 22, 2026, gipahayag sa iyang mga abogado gikan sa Villaraza & Angangco nga ang mga pahayag ni Ombudsman Jesus Crispin Remulla ug pipila ka opisyal nagpakita og daw nauna nang desisyon sa pagpasaka og kasong plunder bisan wala pa’y pormal nga reklamo o pasiunang imbestigasyon.
Gihisgotan sa kampo ni Romualdez ang giingong bias sukad pa Nobyembre 2025, sa dihang miingon si Remulla nga gitan-aw na sa iyang opisina ang kaso ug posibleng adunay kasong plunder.
Pag-abot sa Abril 2026, migawas usab ang mga pahayag nga seryoso nang giandam ang kaso, nga giingon sa depensa nga nagpakita og sayo nga pagpalabaw sa teorya sa prosekusyon.
Gipunting usab sa mga abogado ang press conference diin si Assistant Ombudsman Mico Clavano giingong nagtawag kang Romualdez nga “master plunderer,” nga nagpalig-on sa ilang alegasyon sa bias.
Nangatarungan ang depensa nga ang maong mga pahayag nagmugna og impresyon nga ang imbestigasyon usa lamang ka pormalidad aron suportahan ang gitinguhang resulta.
Tungod niini, nanawagan si Romualdez nga ang bisan unsang reklamo ipatuman ubos sa neyutral ug independente nga opisyal aron masiguro ang patas nga proseso ug mapadayon ang pagsalig sa publiko sa sistema sa hustisya.
