CEBU CITY – Tungud sa mikatap nga momo challenge ug video nga nakita sa social media maoy nakapaaghat sa 42 anyos nga lalaki sa pagpanit sa nawong ni Christine Lee Silawan.
Si Police General Oscar Albayalde mismo maoy ni presentar sa suspek nga si Renato Payuman Llenes kinsang matud pa mihimo og extra judicial confession kung giunsa niini pagpatay kang Silawan. Si Llenes ang residente sa Brgy Bangkal, dakbayan sa Lapulapu ,kinsang nasikop niadtong Abril 9 sa kaadlawon gumikan sa iligal nga paghupot og armas.
Matud ni Albayalde nga nagka ilhanay sila si Llenes ug Silawan pinaagi sa social media diin migamit kini og dummy account ug niadtong Marso 10 maoy unang panagkita sa suspek ug sa biktima duol sa Sacred Heart Parish diin nag serve si Silawan . Matud pa nga gikakurat ni Silawan sa dihang nakita niini si Llanes sanglit wala kini magdahum nga edaran na ang iyang naka chat.
Naglalis matud pa ang duruha sa dihang nahibaw-an sa suspek nga magsige pa og kita ang biktima ug ang kanhi hinigugma niini hilabi na dihang nasayran niini nga dili na birhen ang biktima. Sa tumang kasuko , gidunggab sa suspek ang bitima gamit ang gunting nga dala niini ug paglahuman gipanitan niya ang nawong aron dili matud pa nailhan.
Gibutyag usab ni Llanes nga nasayran niini ang pagpanit sa nawong sa mikatap nga momo challenge ug sa mga video nga nakita niini sa social media. Gidala pa ni Llanes ang panit ug iyang gilabay duol sa lugar nga nahitabuan sa krimen apan sa dihang gipahigayon ang walk-through kagahapong adlawa, walay nakita ang mga kapulisan.
Matud pa nga human masayran ni Llanes nga nakit-an na ang patayng lawas ni Silawan, nagtago tago matud pa kini sa dakbayan sa Mandaue ug sa Cebu City.
Human nga nasikop sa kapulisan gumikan sa iligal nga paghupot og armas, miangkon na lamang si Llanes sa salaud nga iyahang nabuhat .Nangayo usab kini og pasaylo sa ginikanan sa biktima. Gilimpyuhan usab niini ang pangalan sa 18 anyos nga si alyas Jun kinsang una nga gipasakaan og kaso sa NBI 7 gumikan sa maong krimen sanglit inosente matud pa kini.
