Nasagmuyo si Senate Committee on Public Order and Dangerous Drugs Chair, Sen. Ronald Dela Rosa sa kinaiya sa pipila ka sakop sa Kingdom of Jesus Christ batok sa pipila ka mga kapulisan nga sakop sa gipakatap nga team sa compound sa Kingdom of Jesus Christ (KOJC).
Atol sa hearing sa komitiba ni Dela Rosa sa operasyon sa Philippine National Police sa KOJC, gikabutyag nga adunay mga sakop sa KOJC ang midagmal sa pipila ka mga polis, lakip na ang mga walay kasinatian nga mga sakop niini.
Usa sa mga gipagawas nga video mao ang usa ka patrolman nga maglabay lang unta og basura sa gawas sa compound.
Apan inay pasagdan ang mga sakop sa KOJC nga anaa sa gawas sa gate, ang mga sakop sa sekta maoy nisukol kaniya, nga ang uban nisagpa pa samtang ang ubang mga sakop mibira usab sa iyang abaga ug unsa pa.
Matod ni Dela Rosa, nakasabot siya sa tinguha sa mga sakop sa sekta nga makita ang sulod sa gilabay nga basura, apan matod niya nga dili na kinahanglan nga pasakitan pa.
