Gikataho nga adunay igong mga panalipod alang sa pagpatuman sa mga proyekto sa Farm-to-Market Roads (FMR), sugod sa sunod tuig.
Kini nagsunod sa pagkabutyag sa korapsyon sa maong mga proyekto, diin ang Department of Agriculture (DA) mismo ang nakadiskubre – ang uban niini mga substandard ug ghost projects.
Sumala ni Senate Committee on Agriculture Chairman Kiko Pangilinan, ang Senado naghatag og igong mga giya alang sa pagtukod sa mga proyekto, aron malikayan ang nangaging mga insidente sa korapsyon.
Apil niini ang pag-assign sa DA sa pagdumala sa konstruksyon, imbes nga itugyan kini sa Department of Public Works and Highways (DPWH), sama sa nahitabo kaniadto.
Ubos sa bag-ong regulasyon, kinahanglan usab nga sundon sa DA ang open construction sa maong mga proyekto, aron kini masusi dayon. Apil na ang open funds, lokasyon, pagpalambo sa proyekto, ug uban pang mga hinungdan.
Hangtod karon, gisusi pa sa DA ang mga FMR nga kaniadto gipatuman human nadiskobrehan ang dili husto nga pagpatuman sa maong mga proyekto.
