Gipahigayon ang usa ka signature campaign nga giulohan og “Tay, Kami Naman!” diri sa Sugbo, diin naghiusa ang pipila ka mga grupo aron ipadayag ang ilang kabalaka ug panawagan ngadto sa Korte Suprema may kalabotan sa wala pa maresolbar nga mga petisyon bahin sa pagdakop kang kanhi Presidente Rodrigo Roa Duterte.
Gipadayag sa mga nangulo ang ilang dakong kabalaka sa mga lakang sa Office of the President ug ubang opisyal sa gobyerno nga, nahitabo bisan wala pay klarong awtoridad sa hukmanan, ilabi na nga wala gikonsiderar ang edad ug kahimtang sa kahimsog sa kanhi presidente.
Matod ni Joie Cruz, Tay Kami Naman Co organizer, nga ang upat (4) ka pending nga petisyon naglangkob sa seryosong mga isyu sa konstitusyonalidad, due process, ug limitasyon sa gahum sa ehekutibo, ug direkta kining nakaapekto sa pagsalig sa katawhan sa hudikatura isip katapusang tigpanalipod sa Konstitusyon.
Lakip sa mga panawagan sa mga miapil sa signature campaign mao ang; paspas nga paglihok sa Korte Suprema sa mga pending nga petisyon; pagdeklara nga walay bili ang bisan unsang aksyon sa ehekutibo nga misupak sa due process ug judicial procedures;
pagpanalipod sa kagawasan ug independensya sa hudikatura; ug pagmandu sa Office of the President nga mohimo sa tanang legal nga lakang aron mabalik sa Pilipinas ang kanhi presidente ubos sa balaod sa nasod.
Gipasiugda usab kini sa mga tungod kay naglakip kini sa usa ka kanhi presidente nga, sama sa tanang Pilipino, angay panalipdan sa iyang mga katungod.
Dugang usab niini nga ang paagi sa pag-aresto ug pagbalhin kang Duterte nga walay klarong judicial oversight nakamugna og kuwestiyonableng pagtahud sa rule of law ug sa hurisdiksiyon sa Korte Suprema.
Gihimug-atan sa grupo nga ang pag-aresto kang Duterte naimpluwensyahan sa politika, dili lamang sa balaod og giisip usab siya nga lider nga nanalipod sa soberanya sa nasod ug nakigbatok sa korapsyon.
Kasamtangan pa nga nadetine ang kanhi presidente ug wala pa gihapon nahitabo ang bisan usa ka hearing, hinungdan nga misamot ang kabalaka sa katawhan nga mamahimong normal ang pag-abuso sa gahum kon magpadayon ang kahilom sa hustisya.
