CEBU CITY- Subay sa pagpanumpa ni Atty. Raymond Alvin Garcia isip Mayor sa dakbayan sa Sugbo kinsang naghupot sa acting-mayor role sa kapin lima ka buwan sukad sa suspension ni Dismissed Cebu City Mayor Michael Rama niadtong buwan sa Mayo 2024 kay tangtangon na usab niini ang vision sa kanhi nga “Singapore-like Cebu City”.
Ang pagbaton og “Singapore-like Cebu City” maoy core vision sa administrasyon ni dismissed Mayor Rama diin nagtinguha nga mahimong mas modern ug limpyo nga mapuy-an ang Cebu City sama sa Singapore.
Matod ni Mayor Garcia, nga gusto niya nga mahisama ang dakbayan sa Sugbo sa usa ka first-country apan dili angay nga hinganlan kini og Singapore ang dakbayan sa Sugbo.
Dugang pa niini nga bisan kinsa gustong masusama sa nasud nga Singapore apan, gihimug-atan niini nga lahi ang Cebu City ug aduna kini takos nga maipakita ug timailhan.
Samtang, sa iyang unang opisyal nga adlaw isip hingpit nga Mayor sa dakbayan sa Sugbo, si Mayor Garcia kay mapasigarbuhon nga mibarug uban sa Cebu City Office of the Mayor seal nga dayag nga gipakita ang nagsimbolo sa gibug-aton sa responsibilidad nga hingpit niyang gipas-an isip chief executive sa siyudad.
Sa pagkuha sa tahas human pormal nga nanumpa, gitahasan na si Mayor Garcia sa pagpangulo sa mga inisyatiba ug pagdumala sa dakbayan, pagdumala sa mga mahinungdanong serbisyo, ug pagsiguro sa kaayohan sa katawhan sa Sugbo.
