CEBU CITY-Mobalik sa Cebu City Sports Center sa tuig 2025 ang Sinulog Festival, diin giila isip usa sa labing sikat nga festival sa nasud human kini gipahigayon sa laing venue sa nakalabay nga duha ka tuig.
Kini base sa saad ni Cebu City Acting Mayor Raymond Alvin Garcia sa pakighinabi niini sa Bombo Radyo Cebu diin ang CCSC maoy napili nga mo-host sa maong kasaulogan dili lang tungod sa kasaysayan niini kon dili tungod sa nahimutangan niini sa tunga-tunga sa dakbayan.
Dugang pa sa mayor nga ang accessibility mao usab ang usa sa mga rason nganong dili maka-angayon ang milabay nga duha ka tuig nga Sinulog nga gipahigayon sa South Road Properties.
Ang gobernador sa probinsya sa Sugbo nga si Gobernador Gwen Garcia misuporta sa desisyon sa mayor diin nalipay siya tungod kay mabalik ang naandang tradisyon sa mga Sugbuanon ag kapistahan sa Sinulog.
Kahinumduman nga ang pag-host sa Sinulog Festival gibalhin ngadto sa South Road Properties niadtong 2023 ug 2024 gikan sa direktiba ni Suspended Cebu City Mayor Michael Rama.
Sa pikas bahin, nipasalig si Cebu Gov. Gwendolyn Garcia sa hingpit nga suporta sa Sinulog 2025 sa pagpahigayon sa 2025 Sinulog Festival balik sa Cebu City Sports Center (CCSC).
Diin giimbitar ni Acting Mayor Raymond Garcia ang mga tumatan-aw sa 2024 Pasigarbo sa Sugbo nga mobalik ug mosaksi pag-usab sa Sinulog Festival karong Enero 2025.
