Gipaambit ni Bataan Representative Geraldine Roman nga ang pagkasikop ni kanhi Presidente Rodrigo Duterte sa International Criminal Court (ICC) kay usa ka pruweba nga “No one is above the law”, pruweba usab nga gipaluyohan sa Pilipinas ang lagda sa balaod ug girespeto ang international legal commitments.
Gihatagan og gibug-aton ni Roman nga walay laing mahimo ang gobyerno gawas sa pakigtambayayong sa International Criminal Court ug Interpol, diin nagpabilin ang Pilipinas sa international law enforcement system.
Kini human nga gidakop si Duterte sa iyang pag-abot gikan sa Hong Kong diin siya mitambong sa usa ka kalihokan.
Ang PNP CIDG ug Interpol nagsilbi sa warrant of arrest nga giisyu sa ICC ngadto sa kanhi Presidente.
Nagtuo usab ang magbabalaod nga nakapalig-on sa kaso ang findings sa House’s Quad Committee (Quad Comm) sa drug war ni Duterte ilabi na sa mga testimoniya sa mga pamilya nga biktima sa extrajudicial killings.
Hilabi na nga si kanhi Presidente Duterte mismo ang miangkon nga siya ang nagsugo sa kapulisan sa pagpatay sa mga drug suspects.
Mensahe ni Roman sa mga pamilya sa mga biktima sa EJK nga hinayhinay nang makab-ot ang ilang hustisya.
Subay niini, nanawagan si Roman sa publiko nga respetuhon ang legal nga proseso ug ang sistema sa hustisya aron masiguro ang patas ug tukma sa panahon nga kasulbaran sa kaso.
