Gawasnon na sa temporaryong panahon si Sean Andrew Pajarillo human nakapiyansa dungan sa gipahigayon nga bail proceeding sa Regional Trial Court (RTC) sa dakbayan sa Sugbo gahapong adlawa, Pebrero 13.
Nibayad ang 21-anyos nga akusado og piyansa nga mikabat sa ₱72,000 alang sa kasong Reckless Imprudence Resulting in Homicide.
Kini may kalabutan sa nahitabong hit-and-run nga mikalas sa kinabuhi sa 23-anyos nga negosyante nga si Kingston Ralph Cheng didto sa Paseo Saturnino, Barangay Banilad niadtong Pebrero 8.
Bisan og nakagawas na, gipaniguro sa iyang abogado nga si Atty. Julito Añora Jr. nga dili moikyas ang akusado ug moatubang kini sa mga sunod nga bista sa korte.
Apan matod pa ni Atty. Julito Añora Jr., nagmahay ang maong 21-anyos nga akusado sa hit-and-run ug kanunay niyang makit-an ang iyang kliyente nga maghilak samtang anaa kini sulod sa tambalanan.
Giasoy ni Añora nga nagpabiling hilom ang akusado atol sa inquest proceedings ug bisan kon storyahon kini sa iyang kaugalingong mga ginikanan.
Walay bisan usa ka pulong nga mogawas sa baba ni Pajarillo ug igo lamang kini nga mohilak sa matag higayon nga pangutan-on, butang nga gitan-aw sa abogado nga timailhan sa grabeng trauma nga nasinati sa batan-on tungod sa insidente.
Sa pagkakaron, mobalik una si Pajarillo sa tambalanan samtang nagpaabot sa pagtugot sa iyang doktor sa dili pa kini hingpit nga makauli.
