Mandaue City-Linuog nga pagpatay sa usa ka Japanese national sulod sa iyang kwarto sa lungsod sa Liloan sa amihanang bahin sa Sugbo, gigama sa iyang kaugalingong asawa ug sa kanhi pares niini.
Matod pa ni Arnel Pura, kinsang agent-in-charge sa National Bureau of Investigation Cebu District Office nga naglagot ang asawa human wala mahatag ni Doug Hiroshi Sugawara, 72-anyos, ang P120,000 nga iyang gisaad nga regalo sa wala pa sila makasal niadtong buwan sa Abril.
Diin sa maong kantidad, P60,000 ang gamiton alang sa ‘family outing’ samtang ang nahabilin nga kwarta gamiton sa iyang asawa sa pagtukod og negosyo.
Kung kahinumduman nga napalgan ang patayng lawas ni Sugawara nga nagbuy-od sa sawg sa ilang giabangan nga balay niadtong Nobyembre 25 ning tuiga.
Ingon man gihimakak pa sa asawa ang pagpatay sa Hapon ug nangangkon nga posibleng gitulis ang iyang bana sa wala pa kini gipatay.
Apan, sa pagsubay sa mga ahente sa NBI nadiskubrehan niini ang nagpaluyo sa kamatuoran sa kamatayon ni Sugawara.
Sa pagkakaron, ang duha ka mga suspek gitanggong na sa custodial facility sa NBI-CEBDO Mandaue human masikop ang lalaki kinsang nagtago-tago sa Cagayan De Oro ug mag-atubang sa kasong parricide ang ipasaka batok sa asawa sa biktima samtang kasong murder ang ipasaka batok sa iyang kanhi hinigugma.
