LAPU-LAPU CITY, CEBU-Ipa-summon sa National Bureau of Investigation Cebu District Office (NBI-CEBDO) ang usa ka Sugbuanong negosyante aron sa pagkonpirmar sa panag-iya iini sa Tourist Garden Hotel sa Barangay Agus, dakbayan sa Lapu-Lapu diin nasuta kini nga usa ka POGO Hub niadtong Agosto 31, 2024.
Kini ang pamahayag nga gibuy-an ni Agent Arnel Pura, ang pangu sa NBI-CEBDO kagahapon adlaw sa Biyernes, Nobyembre 8 diin gitataw niini nga usa ka inila nga negosyante ang ilang ipatawag sa sumusunod nga semana sa paghatag og katin-awan sa detalya sa contract og lease tali sa Chinese National nga si Zhao Shou Qi, kinsa ang giingong tag-iya sa operasyon sa POGO sa maong dapit.
Nakaplagan ang kontrata sa pag-abang dihang giablihan nila ang pito ka vault sulod sa opisina ni Zhao Shou Qi niadtong Martes, Nobyembre 5.
Ang hotel ug ang tibuok compound niini adunay gilapdon nga halos 1.6 ka ektarya nga giabangan kini sukad niadtong 2018 nga adunay tinuig nga abang nga P6-milyones ug rental bond nga P30-milyones, ang pag-abang nga molungtad hangtod sa tuig 2048.
Matod ni Pura nga walay timailhan nga ang tag-iya personal nga nagdumala sa maong lugar atol sa operasyon sa POGO.
Dugang sa opisyal nga tawgon ang tag-iya aron maklaro ang mga butang ug aron makakuha ang NBI og affidavit gikan kaniya.
Ingon man nga sa panahon sa pag-abang ang hotel building lamang ang pasilidad sa sulod sa compound, ug unya si Zhao Shou Qi na ang nagtukod og dugang nga mga pasilidad sama sa laing building nga kapuy-an sa POGO, restaurant, KTV bar ug uban pa.
