CEBU CITY-Imbis nga kwarta, plastic (basura) ang imong ibayad aron makapalit og bugas, tsinelas, sinina, school supplies ug uban pa.
Kini ang tanyag sa ‘Plastic Barter Store’ kung diin i-barter lang nimo ang kinilong plastic nga basura makakuha ka og mga goods sama sa bugas, school supplies, mga sardinas og uban pa.
Sigon ni Gina Espenilla kinsang maoy in charge sa maong tindahan ug ekslusibo nga nahinabi sa Bombo Radyo Cebu nga gipaluyuhan kini sa gipaluyuhan kini sa programa sa mga madre ug pari sa Balay Samaritano inubanan sa Rotary Club Metro Cebu.
Tumong niini nga mapreserbar ang kalikupan, matudluan ang katawhan nga dili pataka og labay sa mga basura ilabina ang plastic ug ingon man ang pagtabang sa mga kabos.
Sa pagbarter, ang 4 kilos nga plastic, mamahimong makabarter og usa ka sinina, notebook, tsinelas ug school supplies.
Samtang ang 8 kilos nga plastic, mabarter sa usa ka kilong bugas ug ingon man 2 ka book nga sardinas. Ang mga plastic nga ilang matigom, himoon ug i-sagol sa hollow blocks. Ila kining ibaligya ug ang halin mao ang ipamalit og goods para sa tindahan.Apan sa karon, ang mga items ang gikan sa mga donasyon.
Labaw sa tanan, dako usab nga tabang para ni Espenilla ang pagtrabaho sa maong tindahan sanglit ug wala pa kini wala unta siya’y income ug ikapalit og tambal sa iyang anak nga dunay sakit.
Abli ang plastic barter store Lunes hangtud Sabado sa alas 9 sa buntag hangtud alas 3 sa hapon.
Sirado kini matag Dominggo ug kung Holiday. Nahimutang sa No. 36 Mabini St.,niining dakbayan tapad sa USP Foundation.
