Gibabagan sa mga sunod-sunod nga pag-atake sa drone gikan sa Ukraine ang mga flight sa upat ka mga tugpahanan sa Moscow, pipila ka adlaw sa wala pa ang parada sa Victory Day nga tambongan sa mga lider sa kalibutan lakip ang Presidente sa China nga si Xi Jinping.
Sumala ni Moscow Mayor Sergey Sobyanin, labing menos 19 ka Ukrainian drone ang gipalupad sa mga depensa sa hangin sa Russia sa palibot sa kaulohan, ang ikaduhang gabii sa sunod-sunod nga mga pag-atake.
Hinuon, walay gikataho nga naangol, apan pipila ka mga debris ang nahulog sa nag-unang highway.
Gikatahong anaa sa 105 ka mga drone ang na-intercept sa tibuuk nga Russia, sumala sa defense ministry sa Moscow.
Nahitabo ang insidente sa wala pa miabot si Pres. Xi sa Mayo 8 alang sa tulo ka adlaw nga state visit ug moapil kini sa Mayo 9 alang sa Victory Day parade, nga maoy labing importante nga selebrasyon sa kalendaryo ni Pres Vladimir Putin.
Gipaabot usab nga motambong mao ang Presidente sa Brazil nga si Lula da Silva, To Lam sa Vietnam, ug Aleksandr Lukashenko sa Belarus.
Samtang, gikuwestiyon ni Ukrainian President Volodymyr Zelensky ang unilateral ceasefire nga gideklarar ni Putin para sa Victory Day, nga miinsistir nga andam lang siya nga mopirma alang sa mas taas nga ceasefire.
Gipasidan-an usab ni Zelensky ang mga diplomat nga nagtambong sa Moscow nga dili siya responsable sa bisan unsa nga mahimong mahitabo sulod sa teritoryo sa Russia tungod sa nagpadayon nga gubat.
