Mokabat sa walo ka mga suspek, lakip ang usa ka High-Value Target (HVT), ang nasikop sa sunod-sunod nga anti-drug operations nga gipasiugdahan sa PDEA-7 ug Cebu City Police Office (CCPO) niadtong Biyernes, Pebrero 20.
Diin sa buy bust operation sa Sitio Kalunasan, Brgy. Inayawan, nasikop sa mga otoridad ang usa ka 31-anyos nga e-bike driver nga nailhan sa alyas nga “Siyoy,” ug nakuha gikan kaniya ang 57 gramos nga gituohang shabu, ug adunay kantidad nga gibana-bana nga P387,600.
Samtang adunay duha ka managlahing operasyon ang gihimo sa maong barangay ug gironda sa PDEA ug PNP ang usa ka drug den pinaagi sa search warrant.
Sikop usab ang operator nga si alyas “Lowell” 37 anyos, uban sila si alyas “Clark” 23 anyos, “Chini” 31 anyos, ug “Noel” 51 anyos, ug nasakmitan kini og 11 gramos nga shabu nga adunay gibana-banang kantidad nga P74,800 ug mga drug paraphernalia.
Sa laing bahin sa susamang barangay,nasikop ang usa ka caretaker nga si alyas “Ana” 34 anyos, ug duha ka bisita nga sila alyas “Engelbert” 44 anyos ug “Edward” 46 anyos.
Subay niini, ang tanang ebidensya gidala na sa PDEA 7 Regional Laboratory, samtang ang mga suspek nagtingkagol karon sa selda sa PDEA 7 sa Barangay Lahug.
Mag-atubang sila og bug-at nga kaso ubos sa Republic Act 9165 (Comprehensive Dangerous Drugs Act of 2002). Diin ang pagbaligya og droga ug pag-operate og drug den adunay silot nga pagkabilanggo sa tibuok kinabuhi ug multa nga moabot og P10 milyones.
