CEBU CITY-Nakaangkon og nagkandaiyang samad sa iyang lawas ang usa ka Korean National human gitigbas sa laing Koreano gamit ang atsa sa Pacaña Street Brgy.Tisa Cebu City.
Giila ang biktima nga si Park Jungyul, hingkod ang edad ug kasamtangan nagpuyo sa Hope-In Ayala Building Cebu City.
Samtang, ang gitumbok nga suspek kay nailhan nga si Lee Jiwan.
Matud sa imbistigasyon sa Labangon Police Station 10 nga ang biktima naningil sa utang nga 1 milyon sa usa ka ginganlang Henry nga kauban sa suspek.
Ug nagkasinabot ang duha ka habig nga mag-estorya ug magkita sa usa ka hotel apan gipasakay ang biktima sa itom nga van ug gituyok-tuyok, ug ang plano nga mag-istoryahanay kay misangpot sa panaglalis ug pagpanigbas.
Ang biktima nakahiagyon ug ambak sa sakyanan ug nakapangayo og tabang sa mga motorista sa naasoy nga dapit ug daling gidala ang biktima sa tambalanan.
Kasamtangang nagpadayon pa ang imbistigasyon sa kapulisan sa naasoy nga insidente.
