Gikatahong mag-abli og mga oportunidad ang Women’s Maharlika Pilipinas Basketball League (WMPBL), ang labing unang women’s professional hoops league sa nasod alang sa mga babayeng atleta.
Matud ni Senate Majority Leader Francis Tolentino nga ang WMPBL makatampo sa nasudnong sports development, nga nagtawag niini nga usa ka “breakthrough” alang sa women’s basketball.
Diin nanghinaut kini nga ang liga kay magsilbing plataporma alang sa paghatag og gahum sa kababayen-an ug pagpalambo sa nasudnong panaghiusa pinaagi sa sports.
Ang liga makadani og daghang mga atleta sa tibuok nasud tungod kay nagplano kini nga moduwa sa mga piniling probinsiya.
Gipasalamatan usab niya si kanhi senador Manny Pacquiao sa pag-organisar sa liga, nga gihulagway sa naulahi nga usa ka “revolution that brings women’s basketball to the forefront.”
Subay niini, ang inaugural invitational magsilbi nga pasiuna sa unang season sa WMPBL, diin gipaabot nga magsugod sa ulahi ning tuiga.
