CEBU CITY-Mihangyo ang chair sa Cebu City Council’s Tourism Committee sa Cebu City Transportation Office (CCTO) nga mo-draft og development plan alang sa transport system sa dakbayan alang sa 2030.
Ang tumong sa pagduso sa maong plano arun masusama sa laing nasud nga adunay paspas nga transportasyon ug sistema.
Partikular nga gihangyo ni Konsehal Jocelyn Pesquera ang CCTO ug ang City Planning and Development Office sa pag-andam sa Cebu City Transport System Development Plan 2030 nga susama sa Transport System Development Program sa Moscow 2030 diin gipakita sa plano sa pag-uswag kung giunsa pagsugod sa Moscow ang ilang panan-aw alang sa 2030 nga sistema sa transportasyon.
Atol sa pakighinabi sa Bombo Radyo Cebu kang konsehal Pesquera, gipaambit usab niini ang iyang obserbasyon sa pagbisita sa Russia diin nakita niya nga dali ang pagbyahe sa mga katawhan pinaagi sa public transportation ug mao kini ang giisip nga ‘best option’.
Subay niini, nihatag usab sa iyang habig ang opisyal kabahin sa mitumaw nga posibleng pailisan ang mga tranditional buses ngadto sa electric buses diin matud niini nga maayo nga adunay plano nga gipanglantawan arun sa pagpalambo, apan kinahanglan ikonsiderar ang mga butang kung angayan ba kini sa kasamtangang sitwasyon.
Gihimug-atan niini nga ang pagkopya sa laing nasud dili sayon ug dili diha-diha dayon tungod kay moagi pa og proseso, hilabi na nga adunay nagkandaiyang kalamboan ug kinaiyahan ang matag nasud.
Ug ingon man nga angayan kini nga tun-an gumikan nagkinahanglan og ‘consistency’ nga mihaom sa balaod sa kadalanan.
