UGANDA-Posibleng hukman og tibuok kinabuhing pagkapriso ang usa ka lalaking manambalay sa Uganda human nakuhaan og 24 ka mga kalabera sa tawo kansa posibleng iyang gigamit sa ‘human sacrifice’.
Sigon ni Police spokesperson Patrick Onyango, ang suspetsadong si Ddamulira Godfrey, kasuhan ubos sa Prevention and Prohibition of Human Sacrifice Act.
Gawas sa nakit-an, nakakaplag usab sila og mga kalabera ug panit sa mananap sa shrine ni Godfrey sa suburbs sa capital Kampala.
Ingon man nga gi-angkon ni Godfrey nga usa siya ka albularyo ug herbalist apan wala siya girekognisar sa Traditional Healers’ Association sa maong nasud.
Dili kini ang unang higayon nga aduna’y makalilisang nga discovery nga ingon niini tungod kay ning mi-aging buwan, narekober sa kapulisan ang 17 ka mga kalabera sa tawo sa usa ka shrine gihapon sa central district sa Mpigi, kansa 41-kilometers ang gilay-on gikan sa Kampala.
