Nasikop ang anaa sa 3 ka mga indibidwal human naronda sa mga kapulisan ang ilang operasyon sa illegal abortion sulod sa usa ka lawak sa lodging house sa Barangay Mabolo ning dakbayan sa Sugbo, kagahapong adlawa sa Huwebes, Hunyo 19, 2025.
Sa giingong 3 ka mga indibidwal, usa sa 75-anyos nga ginang ang prime suspect sa kalihokang pangpanglaglag tungod kay mao kini ang “abortionist” nga giilang si Amparo Gemarangan Lumagbas nga lumulupyo sa Barangay Mohon sa dakbayan sa Talisay.
Ang ubang kaubanan niini nga giilang sila Romar Solinap Pagunsan, 46-anyos, taga Barangay Guinsay dakbayan sa Danao ug si Jessie Hemarang Juntilla, 40-anyos, taga Barangay Mohon dakbayan sa Talisay.
Matod pa nga sila Romar ug Jessie kay mao nay mga tig-transact sa kalihokan pinaagi sa pakig-dayalogo sa mga kliyente online nga nagkantidad og P40,000 ang presyo sa ilang ginadiling serbisyo.
Atol sa pagkasikop sa 3, nakuhaan kini sa mga nagkadaiyang gamit pang-medical, mga tambal, ug ubang mga gipanagiya sa mga dinakpan nga matod pa nila bali 1 ka tuig na kini nila nga gipadagan ang maong operasyon.
Sa pamulong ni Police Regional Office–Central Visayas Director Brigadier General Redrico Maranan kay gibutyag niini nga ang pagkadakop sa mga suspetsado kay usa ka offshoot operation sa insidenteng nahitabo sa milabayng semana sa lungsod sa Liloan diin adunay 2 ka puya (fetus) ang nakit-an hinungdan ang ilang gipalawman ang imbestigasyon og diri natudlo ang posibleng koneksyon sa operasyon sa illegal nga abortion.
Kasamtangang natanggong karon ang mga dinakpan sa kustodiya sa Cebu City Police Office diin nagpaabot kining pasakahan og tukmang kaso.
