CEBU CITY – Pito ka mga barangay kapitan sa dakbayan sa Lapu-Lapu ang nipasaka og kaso batok kang Lapu-Lapu City Mayor Junard “Ahong” Chan ug pipila ka mga opisyal sa dakbayan ug pribadong indibidwal tungod sa giingong malversation of public funds ug anti-graft and corrupt practices act atubangan sa buhatan sa Visayas Ombudsman.
Gisang-at ang maong reklamo niadtong Pebrero 9, 2022, kalabot sa Coronavirus Disease 2019 (COVID-19)-related nga mga pagpalit sa siyudad niadtong 2020 ug 2021 nga mikabat sa P47,225,550.
Gawas kang Chan, ang ubang respondents sa reklamo mao sila si Lawyer James Sayson, Ronald Malacora, Nagiel Bañacia, Romeo Berame, Nestor Tuñacao, Claire Cabalda, Annabeth Cuizon, ug Sunshine Lim.
Lakip usab ang mga pribadong respondents nga sila si Charles Lim, Emma Lim, Michael Lim, ug Anna Marie Sing gikan sa Heritage Muebles Mirabile Export, Inc., kinsa nakadawat ug award sa COVID-19-related nga mga pagpalit sa siyudad.
Lakip sa mga gipamalit ang pagkaon ug dili pagkaon nga mga butang.
Gikuwestyon ni Bankal Barangay Captain Eduardo Cuizon, Association of Barangay Council (ABC) president sa dakbayan, ang mga transaksiyon nga gisudlan sa dakbayan sanglit ang nakadaog nga bidder nag-eksport sa mga furniture ug real estate business.
Tataw pa ni Cuizon nga ang ilang reklamo base sa report gikan sa Commission on Audit (COA) nga gipagawas niadtong 2021.
Base sa report nagkanayon niadtong 2020, nipalit ang siyudad og non-food relief items nga nagkantidad og P7 milyones ug mga suplay alang sa COVID-19 facility nga nagkantidad og P4.925 milyones gikan sa maong kompanya.
Apan, pabilin pa nga wala moluwat og tubag si Chan kabahin sa maong alegasyon.// BJR
