CEBU CITY – Gitataw ni Cebu City Mayor Edgardo Labella nga aduna kini gihan-ay karun nga formula arun nga makabalik ang mga vendors sa ilahang naandan nga pwesto nga dili usab maka-ali sa agi-anan sa publiko.
Apan giklaru sa mayor nga kinahanglan una niini ipananghid ngadtu ni DILG Secretary Eduardo Año.
Matud ni Mayor Labella nga katungdanan niini nga limpyuhan ang kadalanan isip mandu usab ni Presidente Rodrigo Duterte apan giingung dili mahimu nga talikdan na lang ang mga apektado nga sidewalk vendors.
Gisaad sa mayor nga paningkamutan niini nga dili maapektahan pagmaayu ang mga vendors nga mga nanginabuhi usab alang sa ilahang tagsa-tagsa ka mga pamilya.
Napanglantawan ni Labella nga kung mahan-ay na niini ang tanan giingung posibling mahimu pang ‘tourist attraction’ ang mahimutangan sa mga sidewalk vendor.
