CEBU CITY — Giimbestigaran sa kapulisan ang managlahing mga insidente sa pagpamusil kagabii sa dakbayan sa Sugbo diin duha ang natalang patay.
Una, patay ang usa ka lalaki human gipusil sa riding in tandem pasado alas-12 sa tungang gabii sa B. Aranas Street, Brgy. Duljo Fatima, sa susama nga dakbayan. Giila ang biktima nga si Niño Aguilar, 39 anyos, ug residente usab sa nahisgutang dapit.
Matud sa imbestigador nga si Police Master Sergeant Nikolo Gonzales sa Mambaling Police Station, nga nag-istambay si Aguilar sa gawas apan gipusil kini sa dihang milabay kaniya ang duha ka mga wala mailhing lalaki sakay sa usa ka motor.
Dugang pa niini nga sa wala pa nahitabo ang pagpamusil, mitambag ang inahan sa biktima nga dili una maggawas-gawas sa panimalay.
Nasayran sa gipahigayong imbestigasyon nga nagpinusilay silang Aguilar ug nagpailang alyas “Gil” niadtong Dominggo, Nobyembre 24 mahitungod sa isyu sa giingong love triangle.
Narekober sa SOCO team gikan sa biktima ang usa ka .38 revolver nga armas ug aduna kini unom ka bala.
Personal grudge ug love triangle ang gilantaw nga anggulo sa kapulisan subay na sa mas gipalawom nilang imbestigasyon.
Samtang pagkalambigit sa paggamit sa ginadiling drugas maoy usa sa mga anggulong gitutukan sa kapulisan kalabot na sa pagpamusil-patay sa laing lakaki sa Sitio Riles, Brgy. Hipodromo, dakbayan sa Sugbo. Giila ang laing biktima nga si Erwin Vestil, 42 anyos, ug nanimuyo sa maong dapit.
Matud ni Police Staff Sergeant Roy Bacus sa Mabolo Police Station nga nakiglalis ang biktima sa wala mailhing lalaki dayon og pusil ngadto kaniya.
Nakaangkon og mga samad-pinusilan si Vestil sa iyang abaga, dughan, ug likod nga miresulta sa hinanali niyang kamatayon.
Dugang pa ni Bacus nga usa ang ginadiling drugas sa gilantaw nga anggulo human masayran gikan sa amahan nga gituohang tiggamitan ang biktima niini. (with reports by Bombo Eric Amaro and Bombo Crisle Adlawan/GN)
