Gipangita na karon sa Danao City Government ang grupo sa mga kalalkin-an kinsang giingong namahid og pintal nga gisagulan og laway atol sa Sinulog grand parade sa Mango Avenue, dakbayan sa Sugbo.
Kini human nga nakaani og pagsaway gikan sa katawhan kalabot na sa binuhatan sa maong grupo nga gikatahong gikan pa sa Danao City.
Kung mahulagway, gipahid sa nahisgutang mga kalalakin-an ang pintal nga adunay laway ngadto sa matag mamyestahay nga molabay sa Mango Avenue.
Sa social media post gikan sa Danao City PIO, nagkanayon kini nga nakakuha na sila og copy sa maong video alang sa pag-ila sa mga nalambigit niini.
Dugang pa niini nga i-endorso ang maong isyu ngadto sa Sangguniang Panglungsod atol sa ilang regular session karong adlawa.
Kini sumala na sa tambag gikan sa Committee Chairman on Peace and Order, Public Safety and Human Rights sa konseho.
