CEBU CITY — Misaka ngadto sa 10 ang ihap sa mga kumpirmadong kaso sa coronavirus disease o COVID-19 sa Pilipinas.
Matud sa Department of Health (DOH), nigawas ang resulta sa testing kung diin nadugangan og upat ang kumpirmadong pasyente sa COVID-19.
Base sa giluwatang press release kagabii, usa ka 38-year old Taiwanese ang ika-7 nga kumpirmadong kaso niini kung diin wala kini travel history apan aduna kini close contact sa laing Taiwanese national kinsang nagpositibo usab sa coronavirus.
Samtang usa ka 32-year old nga Pilipino ang ika-8 nga kaso diin mibyahe kini sa Japan sa nakalabay nga 14 ka adlaw ug nakasinati og mga sintomas niadtong Marso 5.
Usa ka 86-anyos nga Amerikano usab ang ika-9 nga COVID patient human nabantayan ang sintomas niini niadtong Marso 1.
Nakasinati kini og hypertension ug adunay travel history sa USA ug South Korea.
Samtang walay travel history usab ang 57-anyos nga Pilipino nga nahimong ika-10 nga pasyente diin aduna kini close contact sa laing COVID-infected patient.
Dugang pa sa DOH nga gidala na sa pribadong tambalanan ang upat ka mga bag-ong kumpirmadong kaso sa COVID-19 sa Pilipinas.
‘Partly true si Lacson’
“Partly true” kun naay gamay nga kamatooran matud pa ang giingon ni Sen. Panfilo Lacson nga ‘underreporting’ ang gihimo sa DOH kalabot sa corona virus.
Kini ang gibutyag ni Dr. Rene Josef Bullecer usa ka medical doctor nga dili man usab maato sa DOH gumikan usab kay nagkuwang usab sa mga personnel ilabina nga tanang LGU ang gitutukan niini.
Apan gihimiug-atan ni Bullecer nga human sa taho sa DOH nga duna nay local transmission kinahangaln gyud nga pasabton ang publiko ug balik-balikon sa pag-edukar ang katawhan kalabot niining maong virus.
Ilabina nga gi-uyunan ni Duterte ang girekomendar sa DOH nga ipaubos sa State of Public Health Emergency ang nasud.
Gi-angkon ni Bullecer nga isip usa ka doktor wala pa gyud matino ang hinungdan niining maong sakit ug wala nasayod kung kanus-a kita nga mag-atubang aning maong hagit ug posibli usab nga bisan unsang adlawa, mamahimong mukalit og saka ang ihap sa mga mataptan niining maong sakit.
Importante sa pagkakaron nga me-edukar og ensakto ang katawhan aron nga dili kini magpanic ug dili mahadlok.
‘Wala nahadlok ang publiko’
Wala nahadlok ang usa ka residente sa Sitio Kan-irag, Brgy. Sirao bukirang bahin sa dakbayan sa Sugbo, sa COVID-19 outbreak.
Matud ni Elnan Ingles, nga nagsunod siya sa mag balita nga iyang mabati-an gikan sa social media ug ingon man sa radyo ug telebisyon.
Apan gitataw niini nga wala siyay nabantayan nga precautionary measures nga gihimo ang barangay hangtud niining mga orasa.
Sa iya nalang matud pa siyang kompanya nakat-on sanglit gipahimangno-an sila nga magmask kung sila gi-ubi o gisip-on. (with reports by Makati Newscenter and Bombo Joann Gantalao/fdp/gn)
