CEBU CITY — Mipahimagno ang World Health Organization (WHO) nga tinuod ang hulga nga mamahimong pandemic ang outbreak sa coronavirus disease o COVID-19 lukop kalibutan.
Kini ang nahimong pamahayag ni WHO chief Tedros Adhanom Ghebreyesus subay na sa nagkasaka nga ihap sa mga infected sa maong sakit.
Gihimug-atan ni Ghebreyesus nga bisan pa man og paingon na sa pagka-pandemic ang coronavirus, makontrolar gihapon kini.
Matud niini nga dili gayud magpakontrol ang mga tawo sa coronavirus.
Mipasalig hinuon ang WHO nga makontrolar ug ma-contain gihapon ang coronavirus disease bisan pa man og paingon na kini sa pandemic nga level niini.
“Now that the coronavirus has a foothold in so many countries, the threat of a pandemic has become very real. But it would be the first pandemic in history that could be controlled. The bottom line is: we are not at the mercy of this virus,” sigon pa ni Ghebreyesus.
Una niini, gi-lauman ni Dr. Rene Josef Bullecer, usa ka international human life advocate, nga mas mudaghan pa ang kaso sa COVID-19 ug nagtoo kini nga muabot pa kini sa libo-an.
Gani, duna na matud pay plano ang WHO nga mudeklalarar nga pandemic na kini.
Ang Pandemic ang duna matud pa’y 3 ka requirement ayha makarekomendar niini.
Una mao ang pagtumaw sa usa ka kagaw nga maghatag og sakit sa publiko.
Ikaduha mao ang pagkompirmar nga makatakod ug nagtinakoray na ang mga tao ug ang ikatulo kung katunga na sa mga nasud sa kalibutan ang nataptan niini.
Sa karon anaa na sa 80 kapin ang nasud nga naapektaran hayan ipagawas na ang mild pandemic status.
