CEBU CITY-Gi-awhag karon sa Commission on Elections (Comelec) ang tanang mga botante, ilabi na sa dakbayan sa Sugbo, nga magparehistro alang sa umaabot nga 2022 presidential elections.
Kini human nga gipahibalo sa Election Officer sa Cebu City North nga si Atty. Marchel Sarno nga ablihan pagbalik ang buhatan sa Comelec sa publiko aron ipadayon ang voter’s registration.
Isip pagsanong sa mga minimum health standards ubos sa new normal, gihangyo ni Sarno ang publiko nga maghimo una og appointment online sa dili pa mobisita sa buhatan.
Mamahimong i-download ang registration form sa website sa COMELEC, pagkahuman magprint og tulo (3) ka kopya niini nga back-to-back gamit ang long bond paper, ug isuwat ang gikinahanglang mga impormasyon.
Inig bisita na sa buhatan sa Comelec, magdala og valid ID ug printout sa gitagana nga schedule.
Dugang pa ni Sarno nga istriktong ipatuman ang mga health protocols sama na lang sa pagsul-ob og face mask ug face shield sa sulod.
Abli ang buhatan sa Comelec sa adlaw nga Martes ngadto na sa Sabado, sa alas-8 sa buntag hangtud na sa alas-3 sa hapon.| GN
