CEBU CITY — Makabalik sa pagbyahe sa dalan ang 19 ka mga traditional jeepney units human nakapasar sa gipahigayung “One-Stop Shop” sa North Reclamation Area sa dakbayan sa Sugbo.
Matud sa chairman sa Cebu City Jeepney Task Force nga si Kon. James Cuenco nga ubay-ubay ang mga jeepney units nga wala nakapasar sa mga rekisitos sama lang sa road worthiness test.
Daghang mga jeepney, matud pa, ang wala nakapasar sa mga standards sama lang sa kahimtang sa makina, suga, ligid, ug apil niini ang smoke-emission test.
Awhag pa niini sa mga drayber ug operator nga ipatan-aw una sa mekaniko ang kahimtang sa unit.
Sa mga makapasar nga drayber, hatagan sila og ID gikan sa syudad nga nagpamatu-od nga ni-agi kini sa swab testing ug uban pang resikitos nga gipangayo.
Sa laing bahin, gibutyag usab ni Cuenco nga upat ka mga drayber ang nagpositibo sa COVID-19 human nga adunay usa nga napuno sa pooled testing diin gi-extract na kini og gipang-contract tracing.
Matud usab niini nga nitambong ang usa sa mga nagpositibo sa usa ka seminar nga gipahigayun sa buhatan sa LTO.
Pagtataw pa ni Cuenco nga hinay-hinay og pagbalik ang mga jeepney ug dili kini kinahanglan nga dalion arun dili kini ang mahimong rason nga managhan ang COVID-19 sa syudad sa Sugbo.
Magpadayun ang one-stop shop hangtud sa Nobyembre 27 ug target sa jeepney taskforce nga makadagan balik ang 1,300 kapin ka mga unit. (ekp/gn)
