CEBU CITY — Gihimug-atan ni Cebu 5th District Board Member Glenn Anthony Soco nga dako og tabang ang hinay-hinay nga pagpabalik sa turismo sa lalawigan aron nga molagsik pagbalik ang ekonomiya.
Matud sa chairman sa Provincial Board Committee on Commerce nga si Soco nga fully-booked ang kadaghanan sa mga hotels ug resorts sa lalawigan sa nakalabay nga holiday season.
Kini nagpamatuod nga nabuhi pagbalik ang turismo sa probinsya nga maoy tinguha sa Provincial Government aron makabangon human sa coronavirus crisis.
Una nang nagkanayon si Soco nga ang consistency sa pagpatuman sa health and safety protocols sulod sa mga tourist sites aron magpabiling luwas ang negosyo ning panahon sa new normal.
Samtang gidayeg sa board member ang presentasyon sa Bombo Radyo Philippines nga “Beauty and Wonders of the Philippines” kung diin gipakita niini ang mga nag-unang tourist destinations sa Cebu Island sa tinguha nga ma-enjoy sa mga lokal nga bisita ang mga nag-unang laaganan.
