CEBU – Gikalipay sa LGBTIQ community ang nahimong tinguha ni Senator Robin Padilla nga ma-institutionalize ang civil union sa same sex couples sa nasud.
Kini human gisang-at ni Padilla ang Senate Bill No. 449 o ang Civil Unions Act aron mahatagan og patas nga katungod ug pag-ila sa managsamang sekso nga magtiayon.
Sa eksklusibong pakighinabi kang Magdalena-Robinson, chairperson sa Cebu United Rainbow LGBTIQ+ sector, nga nagkanayon kini nga ilahang gihangop ang lakang ni Senator Padilla bisan paman sa unang termino niini gumikan dugay nang adbokasiya sa ilahang grupo ang civil union sa same sex couples sa nasud.
Apan, bisan paman niini, giklaro ni Robinson nga sila sa ilahang grupo dili uyon sa sexbased ra kaayo nga termino sa maong balaudnon.
Hinuon, gihimug-atan niini nga makahatag og benepisyo sa ilahang sektor ang lakang ilabi na kung magminyo ang parehas og sekso o lalaki-lalaki o babaye-babaye, gumikan maghatag kini kanila og custody rights, tax rights , income ug lakip na sa paghimo og desisyon.
Giklaro usab ni Robinson, nga dili buot pasabot nga same sex civil union gikinahanglang na ang usa ka pormal nga kasal diin magsul-ob og gown ang usa ka bride.
Gitataw niini nga sa natad sa same sex civil union mamahimo ra nga magpirmahanay ang duha ka indibidwal isip pamatuod nga silang duha nagkasabot nga magpuyo o magsaw sa ilahang mga assets.
