Gitinguha karun sa organizers sa Sinulog 2023 kauban ang Committee on Peace and Order sa dakbayan sa Sugbo nga mahuman lang ang fluvial procession sulod sa duha ka oras.
Gibutyag ni Cebu City Councilor Philip Zafra, nga tinguha nila nga dali kining mahuman nga manukad sa Pier 1 paingon sa ilawom sa CCLEX, ngadto na sa Kawit Island ug pabalik sa Pier 1.
Subay niini, mipahinumdom si Zafra sa mga tanan nga adunay sakayang pang-dagat nga musalmot sa kalihokan nga magpa-rehistro na sa MARINA ug sa Philippine Coast Guard, diin ang maong mga ahensya ang gitahasan sa pagkontrolar sa gidaghanon sa mga sakayan nga mulawig atol na sa fluvial procession.
Nagkanayon ang konsehal nga ilahang nabantayan nga niadtong mga nakalabay nga fluvial procession, daghang mga deboto ang mag-abang ug mga gagmay nga sakayan gikan sa Barangay Pasil, Subay, Duljo-Fatima, Ermita ug Sawang Calero arun nga musugat sa naasoy nga prosisyon.
