Labing minos usa ka unipormadong pulis ang ipakatap duol sa lainlaing mga publikong tunghaan sa dakbayan sa Sugbo aron maseguro ang kaluwasan sa mga tinun-an atol sa pag-abli sa klase karong Agosto 29, matod ni Police Colonel Ireneo Dalogdog, hepe sa Cebu City Police Office (CCPO).
Matud ni Dalogdog nga iya nang gipaabot ang iyang mga instruksiyon ngadto sa mga hepe sa lain-laing police station.
Dugang pa, gusto niya nga ang mga police patrol vehicles nga iparada duol sa mga eskuylahan alang sa dugang police visibility.
Samtang, malampuson ug malinawon ang pagpahigayon sa Brigada Eskwela karong tuiga.
Niadtong Biyernes, Agosto 18, ang mga personahe sa CCPO kauban ang Cebu City Deputy City Director for Administration (DCDA) ug ang Armed Forces and Police Savings and Loans Association, Inc. (APFSLAI) Cebu Branch miadto sa Taptap Integrated School aron motabang sa Brigada Eskwela ug apod-apod sa mga gamit sa eskwelahan.
Matud ni Dalogdog nga aktibong nagsuporta ang CCPO sa pagpatuman sa programa sa Dakbayan sa Sugbo.
Gianunsyo sa Department of Education (DepEd) ang pag-abli sa klase sa mga pampublikong tunghaan karong Agosto 29.
Ang mga pribadong tunghaan gihatagan og opsyon sa pag-abli sa ilang klase gikan sa Hunyo 1 ug Agosto 31.
