CEBU CITY-Gisaway ni Acting Cebu City Mayor Atty. Raymond Garcia ang giluwat ni kanhi Cebu City Mayor Tomas Osmeña sa Quad Committee hearing nga nagpataka lang kini nga adunay “high-rise buildings” sa dakbayan sa Sugbo nga giingong nag-operate og illegal nga operasyon sa POGO.
Matud ni Garcia nga posible ang giingon sa kanhi gumikan wala siyay nakita nga POGO subay sa ilang gihimo nga pagsusi sa mga edepisyo nga anaa sa dakbayan.
Ingon man nga maihap lang ang mga “high-rise buildings” sa Sugbo hinungdan nga dali ra nga matudlo kon adunay illegal nga kalihokan ng maong building.
Hinungdan, kusganong gituohan ug gibarugan ni AM Garcia nga nagpataka ug nagpatuyang lang kini sa iyang gibati, ingon man nga iya kining hugot nga gihimakak.
Una ng gipahibalo sa opisyal nga ipadayon sa Cebu City Government ang pagmonitor sa Philippine Offshore Gaming Operators (POGO) o susamang aktibidad sa dakbayan.
Ilabi na, human kini nakadawat og suwat gikan sa League of Cities of the Philippines nga naghatag og listahan sa mga siyudad ug kompanya nga angayang susihon.
Giklaro ni Acting Mayor Garcia nga bisan og wala pa siya makadawat sa suwat, nagtrabaho na ang task force nga iyang giumol isip tubag sa kamanduan sa presidente atol sa iyang State of the Nation Address.
Gidugang niini nga ang mga “legal” nga POGO gisirad-an ug gipulihan usab sa ubang mga negosyo.
Hinuon gipaniguro sa opisyal nga dili mohunong ang giumol nga task force nga gilangkuban sa Cebu City Police Office ug Business Permit and Licensing Office sa City Hall aron masiguro nga kon aduna pay POGO activities sa dakbayan sa Sugbo nga wala namatikdan.
