CEBU CITY-Gikatahong padayon nga misaka ang ihap sa kaso sa dengue sa dakbayan sa Sugbo niining tuiga.
Diin ang labing ulahing talaan sa City Health kay nagpakita nga ang syudad aduna na’y 2,831 ka dengue cases niadtong Oktubre 8 ug mikabat na sa 17 ang nakalas.
Kini mas taas og 394 ka porsyento kung itandi sa 573 ka dengue cases sa susamang period sa miaging tuig ug upat lang ang namatay.
Matud ni konsehal Mary Ann Delos Santos, nga makapaalarma ang maong gidaghanon hinungdan nga iyang gisaway si City Health Officer Dr. Daisy Villa tungod sa maong pagsaka sa ihap.
Gani, subling nanawagan kini ngadto kang Mayor Raymond Garcia nga tangtangon na si Villa sa iyang katungdanan.
Nasayran usab nga daghan na ang mga reklamo nga nadawat sa Civil Service Commission o kon CSC-7 batok kang Villa.
