CAMOTES, CEBU-Napalgang patay sa lasang nga bahin sa bukirang dapit sa Sitio Dumalerio, Barangay San Isidro, lungsod sa San Francisco, isla sa Camotes, sa amihanang Sugbo pasado 11:50 sa buntag kagahapong adlawa sa Lunes, Nobyembre 11, 2024.
Gikatahong Nawala sulod na sa lima ka adlaw ang maong biktima nga giilang si Glenn Otida Rocacurva, lumulupyo sa Sitio Quampang, Barangay Montealegre sa samang lungsod.
Ang maong patayng lawas nakit-abn nga adunay nakahigot nga pisi sa liog sa biktima ug anaa na sa abante nga kahimtang sa pagkadunot.
Matod pa sa mga kapulisan sa maong lungsod nga katapusang nakit-an ang biktima nga nagkig-inom uban sa iyang upat ka higala niadtong Nobiyembre 6 sa gabii.
Ang grupo gikatahong nakadesider nga moadto sa duol nga barangay diin nagpuyo ang usa sa uyab-uyab sa ilang higala.
Pag-abot sa Sitio Dumalerio, ang biktima nitahan sa iyang kaugalingon aron magpahuway sa kakahoyan apan wala na mobalik ug nagtuo lang ang iyang mga higala nga muuna kini sa pagpauli.
Sa pagbalik sa grupo nga wala na ang biktima, nabalaka ang pamilya ni Rocacurva ug nipasaka og reklamo sa missing person sa police station hinungdan nga girekisa sa kapulisan ang dapit diin posibleng migawas ang biktima apan napakyas kini.
Ang nakakita sa maong patayng lawas kay usa ka lalaki nga nagpagawas sa iyang hugaw sa maong kalasangan.
Dugang pa sa kapulisan nga bisan dili sila sigurado kung naghikog ba ang biktima samtang nagpaabot sa resulta sa autopsy, ang upat niya ka mga kaila gikonsiderar nga persons of interest sa kaso.
