CEBU CITY- Sayo ipang apod-apod sa kagamhanang dakbayan sa Sugbo ang cash assistance para sa mga Senior Citizens ning buwan sa Disyembre 2024.
Kini ang gibutyag ni Cebu City Mayor Raymond Alvin Garcia sa pakighinabi niini sa Bombo Newsteam.
Ang pag-apod-apod ipahigayon sa umaabot adlaw nga Huwebes inig Disyembre 5, 2024.
Maglangkob kini sa buwan sa Oktubre, Nobyembre ug Disyembre ang ayudang pinansyal nga ipang apod-apod nga mubalor og P3,000 (P1,000 kada buwan) sa ilang tagsa-tagsa ka mga barangay, hain moadto ang mga disbursing officers sa City Hall.
Samtang gidasig sab ni Office of Senior Citizens Affairs (OSCA) Executive Director Chito Aragon ang mga katiguwangan sa dakbayan nga magparehistro sa buhatan sa National Commission of Senior Citizens (NCSC) tungod sa transition na nasudnong ahensya sa pagpahamtang sa serbisyo sa mga Senior Citizens sa naasoy nga komisyon nga gikan sa Department of Social Welfare and Development (DSWD).
Dugang pahibawo sa opisyal nga magpatuman usab og revalidation ang buhatan sa OSCA sa tanang mga senior citizens sugod sa sunod tuig.
Updated nga voters certification ang usa sa rekisitos sa OSCA alang sa pag-isyu og bag-ong ID sa mga senior citizens.
