Giawhag sa Department of Agriculture (DA) ang publiko sa pagpahimulos sa mga prutas gikan sa mga lokal nga umahan dungan sa gipaabot nga pagsaka sa demand sa Bag-ong Tuig.
Matud ni Agriculture Assistant Secretary ug spokesperson Arnel de Mesa, nga aron matabangan ang mga lokal nga mag-uuma sa pagbaligya sa ilang mga produkto ug mapahimuslan ang taas nga presyo.
Kini nunot sa gipaabot nga adunay pagtaas sa presyo sa mga prutas sa dili pa ang Enero 1, 2025.
Nanawagan ang opisyal sa mga konsumidor, imbes mopalit og mga imported nga prutas, pilia ang mga produkto sa prutas nga gikan sa mga lokal nga umahan aron makatabang sa industriya sa panguma sa nasud.
Gani, usa sa mga nag-unang tradisyon sa mga Pilipino matag pagsugat sa Bag-ong Tuig mao ang pag-andam sa 12 ngadto sa 13 ka lingin nga prutas sa mga kan-anan tungod sa naandan nga magdala kini og maayong kapalaran sa tibuok tuig.
