MANDAUE CITY,CEBU- Modagsa ang liboan ka mga deboto sa National Shrine of Saint Joseph sa Mandaue City alang sa ‘Traslacion,’ usa ka tinuig nga tradisyonal nga motorkada nga nagdala sa mga imahen sa patron ni Sto. Niño ug ang Virgen de Guadalupe de Cebu gikan sa Cebu City ngadto sa Mandaue City, karong adlawa Biyernes, Enero 17,2025.
Ang direktor sa Shrine nga si Monsignor Antonio Medida miingon niadtong Miyerkules, Enero 15, nga ang mahinungdanon nga kultural ug relihiyoso nga tradisyon nagpakita sa lawom nga pagtuo sa komunidad.
Ang motorcade magsugod sa Basilica Minore del Sto. Niño de Cebu diin mahitabo ang Misa de Traslacion.
Inig human molatas kini sa Osmeña Blvd., M.J. Cuenco Ave., Lopez Jaena St. pinaagi sa Central Nautical Highway, A. del Rosario St. ug S.B. Cabahug St., hangtod nga moabot sa National Shrine of St. Joseph sa Mandaue City.
Sa Traslacion karong tuiga, ang mga imahe sa Sto. Niño ug Our Lady of Guadalupe ang sugaton sa usa ka karwahe nga nagdala sa imahen ni St. Joseph subay sa Subangdaku highway sa dili pa moadto sa shrine.
Malaumon si Medida nga hapsay ang dagan sa santos nga prosesyon ug uban pang kalihokan aron ang tanang partisipante makabaton og makahuluganong kasinatian.
Aron ma-accommodate ang pagdagsa sa mga deboto, gi-adjust sa shrine ang eskedyul niini aron maapil ang lima ka dugang nga misa, gawas sa regular nga serbisyo niini.
Sa pikas bahin, aron pangandaman sa kalihukan, ang Mandaue City Police Office (MCPO) nipahigayon og dry run aron pagpino sa deployment sa mga personnel sa rota sa Traslacion ug pagsiguro sa hapsay ug luwas nga prosesyon.
Gipasabut sa tigpamaba sa MCPO nga si Police Lt. Colonel Mercy Villaro, nga ang dry run makatabang kanila sa pag-ila sa bisan unsang mga kal-ang sa area of responsibility sama sa mga isyu sa drainage, mga linya sa kuryente, o nagkatag nga basura nga kinahanglang hawanan.
Dugang pa niini nga ang pagsiguro nga luwas ug hapsay ang kadalanan hinungdanon alang sa hapsay nga pag-agi sa mga imahen sa relihiyon sa lainlaing mga lugar.
Aron mapalig-on ang seguridad ug madumala ang dakong panon sa katawhan nga gipaabot nga magtapok, mokabat sa 300 ka mga personahe lakip na ang mga pulis, force multipliers, ug mga sakop sa nagkalain-laing ahensya, ang ipakatap.
Ang mga karsada sulod sa dakbayan sa Mandaue nga sakop sa rota sa Traslacion sirad-an 30 minutos sa dili pa ang motorcade moabot sa dakbayan aron masiguro ang luwas ug hapsay nga prosesyon.
