Gikompirmar sa Department of Migrant Workers nga gitun-an pa nila ang panawagan sa deployment ban sa Kuwait.
Matud pa sa kasamtangang kalihim sa maong departamento nga si Secretary Hans Leo Cacdac nga aduna pay mga panagtagbo sa duha ka nasod isip timaan sa pagtahod ug pag-ila sa ilang mga gobyerno.
Apan giklaro sa nasangpit nga kalihim nga mas pahugtan pa ang higpit nga mga pagdili nga gipatuman kalabot sa deployment sa mga Overseas Filipino Workers.
Dugang pa niya nga gusto nila nga bantayan pag-ayo ang kahimtang sa mga trabahanteng Pinoy, ilabi na ang mga domestic helper sa naasoy nga nasud.
Tungod niini, plano sa departamento nga ipatuman ang ‘know your employer approach’ nga polisiya sa tumong nga masiguro nga ang aplikante nakaila sa iyang amo sa dili pa mobiya sa nasud.
Diin, si Secretary Cacdac niingon nga dili lang kini sa Kuwait ipatuman kon dili lakip na sa nagkalain-laing nasud nga adunay mga trabahanteng Pinoy.
Sa laing bahin, uban niining mga restriksyon, wala pa gihapon masulbad ang kaso sa namatay nga Overseas Filipino Worker sa Kuwait nga si Jenny Alvarado.
Matod ni Cacdac, nagpaabot pa sila sa resulta sa imbestigasyon sa National Bureau of Investigation samtang andam na ang kaso nga ilang ipasaka batok sa iyang amo.
