CEBU CITY- Nakahimo og talagsaong mga lakang ang Cebu City Police Office (CCPO) sa pagpausbaw sa kaluwasan sa publiko pinaagi sa lig-on nga serye sa gipakusog nga anti-crime operations gikan sa Pebrero 21 hangtod 23, 2025.
Hinungdan, nga ning bag-ohay lang ubos sa pagpangulo ni Acting City Director Police Colonel Enrico E. Figueroa, ang kapulisan sa Dakbayan nihimo og komprehensibong operasyon nga nailhang SACLEO, nga miresulta sa malampusong pagkasikop sa 132 ka mga suspek nga nalambigit sa nagkalain-laing ilegal nga kalihokan, lakip na ang pagpayuhot sa droga, ilegal nga sugal, ug ang paghupot og dili rehistradong armas.
Sa naasoy nga ihap, ang kapulisan nakasakmit og gidudahang ilegal nga drugas nga gibana-banang mobalor og ₱2,789,564.00 atol sa ilahang gilusad nga 35 ka mga operasyon, nga hinungdan sa pagkasikop sa 38 ka indibdiwal og pagkasakmit sa 410.23 grams.
Dugang pa, nga sulod lamang sa usa ka semana, nasikop usab ang Duha ka-most wanted person ug laing 14 nga wanted person sa ilahang 17 ka mga operasyon nga gihimo.
Samtang, sa Loose Firearms, nakahimo sila og 11 ka operasyon, ug nasikop ang anaa sa 11 ka indibidwal, nakumpiska usab ang 11 ka loose firearms, nga nakatampo sa mas luwas nga palibot alang sa mga residente.
Sa Illegal Gambling nadakpan ang anaa sa 67 ka mga sugarol sa 31 ka mga operasyon nga gipahigayon ug nakumpiska ang anaa sa 2,785.00 nga beating money.
Dinhi, gipasalig sa kapulisan nga nagtutok sila sa pagpadako sa police visibility, responsiveness, ug proactive nga mga estratehiya sa pagpugong sa krimen, aron masiguro ang kaluwasan ug kahapsay sa publiko sa tibuok dakbayan sa Sugbo.
Gihatagan og gibug-aton sa kapulisan nga ang nagpadayon nga mga operasyon estratehikong gidesinyo aron aktibo nga mapugngan ang mga kriminal nga pamatasan, pagpauswag sa usa ka luwas nga komunidad, ug pag-ugmad sa usa ka lig-on nga pagbati sa kaluwasan sa mga lungsuranon.
