CENTRAL VISAYAS-Gironda sa mga sakop sa Philippine Drug Enforcement Agency – Central Visayas ang usa ka drug den sa Sitio Lasang, Barangay Mactan, dakbayan sa Lapu-Lapu niadtong Biyernes sa gabii, Marso 7, 2025.
Gipangulohan ni PDEA-7 Regional Director Alex Tablate ang maong operasyon diin nasikop nila ang target nga si alyas Dante, 44-anyos, walay trabaho, nga lumulupyo sa samang lugar.
Gawas sa target kay nasikop pud niini ang mga kaubanan sa suspek nga sila alyas “Jeff”, 48-anyos, nga maoy drug den maintainer nga inilang mananagat sa dakbayan; alyas “Angel”, 19-anyos nga usa ka entertainer; alyas “Junjun”, 23-anyos nga usa ka dishwasher; ug usa ka alyas “Anton” 32-anyos.
Nasakmit atol sa pagpangronda ang anaa sa 15 ka pakete sa gituohang shabu nga nagtimbang og 11-ka gramos nga adunay standard street value nga P74,800. buy-bust money, ug uban pang drug paraphernalia.
Gipailawom na karong sa evidence disposition ang mga nasakmit nga mga drugas sa Regional Office Laboratory.
Kasong kalapasan sa Article II sa Republic Act No. 9165 ang atubangon sa mga dinakpan nga kasamtangang gitanggong sa PDEA-7 detention facility.
