CENTRAL VISAYAS-Dili mominos lima ka mga indibidwal, lakip ang usa ka Australian national, ang nasikop sa National Bureau of Investigation (NBI) 7 ug Cebu District Office sa managlahing buy-bust operations karong buwana.
Diin ang unang operasyon nahitabo niadtong Marso 14 sa Barangay Duljo-Fatima, dakbayan sa Sugbo, diin tulo ka mga tawo ang nasikop, usa ang mabdos niini.
Nasakmit sa mga otoridad gikan sa mga dinakpan ang P10,000 nga kantidad sa shabu, samtang tulo sa mga suspek kay gitugyan na ngadto sa Cebu City Prosecutor’s Office alang sa inquest tungod sa kalapasan sa Sections 5, 11, ug 15 sa Comprehensive Dangerous Drugs Act.
Ang ikaupat nga suspek nga si Felipe Sano Pateres, kinsa maoy nag-unang target sa operasyon, kay nakaikyas human kini namatikdan nga nagsingabot ang mga sakop sa NBI team.
Hinungdan nga padayon pa kini nga gipaningkamutan sa mga otoridad nga madakpan ug makit-an.
Matud ni NBI-Cebu Executive Director for Operations Bienvenido Panican nga si Pateres kay nag-operate og drug den sa iyang pinuy-anan sulod na sa tulo ka tuig, diin maningil og dugang P50 sa mga mogamit sa drug den si Pateres apan, ang live-in partner niini nga si Basera, mihimakak sa mga pasangil.
Ang ikaduhang operasyon, nga gihimo niadtong Marso 18, diin misangpot sa pagkasikop sa 54-anyos nga Australian national nga si Tony Ristanovski, nga nagpuyo sa Barangay Basak-San Nicolas, dakbayan sa Sugbo.
Sa wala pa ang raid, nihimo og buy-bust operation ang mga agent sa NBI nga miresulta sa pagluwat og search warrant ni Cebu City RTC Executive Judge Anacleto G. Debelucos.
Sa pagrekisa, nakuhaan og P2,000 nga kantidad sa shabu ang mga otoridad, lakip na ang mga drug paraphernalia ug mga gamit nga gigamit sa pagkonsumo og shabu sulod sa iyang apartment.
Gitataw ni NBI-7 Cebu District Office Agent-in-Charge Arnel Pura nga kini ang unang higayon nga ilang nadakpan ang usa ka langyaw nga nalambigit sa pagpamaligya og mga illegal drug paraphernalia, tungod kay kasagaran sa mga dinakpan kasagarang tiggamitan og drugas.
