Napamatud-ang sad-an ang finance officer sa Kingdom of Jesus Christ (KOJC) nga si Amanda Estopare sa pagpalsipikar sa mga dokumento sa imigrasyon alang sa mga sakop sa sekta nga gipadala ngadto sa Estados Unidos sa ilang founder nga si Pastor Apollo Quiboloy.
Nakasilbi na si Estopare sa iyang sentensiya apan sa pagkakaron anaa sa duha ka tuig nga supervised release sa Bureau of Prisons human sa Hunyo 20 nga mando gikan sa US District Court, Central District of California Judge Terry Hatter.
Ubos sa mga termino sa iyang gibantayan nga pagpagawas, si Estopare kinahanglang mosunod sa pito ka kondisyon lakip na ang iyang pagtugot sa usa ka opisyal sa probasyon sa US o tigpatuman sa balaod nga representante nga nagpahigayon sa pagpangita sa iyang mga kabtangan, mga sakyanan, balay, mga dokumento ug uban pang personal nga mga butang ubos sa iyang kontrol.
Ang pagdumili sa pagbuhat niini mahimong moresulta sa pagbawi o pagkanselar sa iyang probation.
Ingon man nga gidid-an usab kini sa pagminyo ni bisan kinsa aron makalikay sa mga balaod sa imigrasyon ug pagpanag-iya, pagtrabaho, pagboluntaryo o pag-apil sa bisan unsang negosyo nga wala’y pagtugot gikan sa iyang probation officer.
Gimandoan usab si Estopare nga hatagan og access ang iyang probation officer sa tanang business records, listahan sa mga kliyente ug ubang mga dokumento nga may kalabotan sa operasyon sa bisan unsang negosyo nga iyang gipanag-iya.
Kahinumduman nga una nang gisentensiyahan sa korte si Estopare uban sa laing mga akusado ni Quiboloy nga sila si Guia Cabctulan ug Marissa Duenas. Diin nagkasabot sila nga mokooperar sa US Attorney’s Office bugti sa mas gaan nga sentensiya ug ang pagbasura sa nahabilin nilang mga kaso.
