Giklaro sa Korte Suprema nga ang sweldo sa mga opisyal sa gobyerno mahimong sakmiton o garnish aron mabayran ang ilang mga utang, subay sa kasamtangang balaod.
Sa desisyon nga gisuwat ni Associate Justice Samuel Gaerlan, ang Third Division sa Korte nagkanayon nga ang sweldo sa mga public officials dili exempted sa garnishment, sama sa kaso ni Atty. Fred Bagbagen.
Gitugotan sa RTC ang garnishment sa iyang suweldo nga gideposito sa Philippine Veterans Bank aron mabayran ang P308,000 nga utang ngadto kang Anna May Perez.
Bisan kung giabsuwelto si Bagbagen sa kaso nga estafa, nakit-an gihapon siya nga adunay civil liability.
Gisalikway usab sa RTC ug Court of Appeals ang argumento ni Bagbagen nga ang iyang suweldo pundo gihapon sa gobyerno hangtod nga magamit.
Apan, matod sa Korte Suprema, walay balaod nga nagpagawas sa suweldo sa mga opisyal gikan sa garnishment.
Ubos sa Rule 39 sa Rules of Court, ang sweldo, pribado man o publiko, mahimong mabayran batok sa utang.
Ug exempted lang kini sa mga manual labor o trabahador diin hangtod sa upat ka buwan nga suholan giprotektahan, aron maseguro ang probisyon sa ilang mga pamilya.
Gihatagan usab og gibug-aton sa Korte nga ang mga empleyado sa gobyerno gihuptan sa mas taas nga mga sumbanan sa pinansyal ug tulubagon tungod kay sila mga kustodian sa pagsalig sa publiko.
