Giablihan na pag-usab sa mga swimmers kaniadtong Sabado sa buntag sa Paris, France ang tanyag nga River Seine diin nagtugot sa publiko nga maligo sa iconic nga suba unang higayon sukad niadtong tuig 1923.
Ang mga Parisians ug mga bisita nga nagtan-aw nga magpabugnaw karong ting-init mahimong mosalom sa maong suba nga magdepende nalang sa panahon sa tulo nga mga lugar nga kaligoanan diin lakip ang usa ka dapit nga doul sa tanyag nga Eiffel Tower.
Pipila ka dosena sa mga tawo ang nangabot sa wala pa ang alas 8:00 sa buntag sa dayong pag-abli niadtong Sabado sa Bras Marie zone sa makasaysayanong sentro sa siyudad diin adunay nag-diving sa tubig alang sa dugay nang gipaabot nga higayon ubos sa mabinantayon nga mga mata sa mga lifeguard nga nagsul-ob og fluorescent yellow nga T-shirt ug nagdala og mga whistles samtang nangaligo.
Ang seasonal nga pag-abli sa River Seine alang sa paglangoy nakita nga usa ka kabilin sa Paris 2024 Olympics, kung ang open water swimmers ug triathletes nakigkompetensya sa mga tubig niini nga espesyal nga gilimpyohan alang sa kalihokan.
Ang mga swimming zone adunay mga lawak nga ilisan, shower, ug mga muwebles nga estilo sa baybayon, nga nagtanyag og luna alang sa 150 ngadto sa 300 ka mga tawo aron makarelax, ibutang ang ilang mga tualya, ug makapahulay gikan sa kasamok sa siyudad.
Ang mga opisyal sa Paris nag-ingon nga ilang gihimo ang daghang mga lakang aron masiguro nga ang mga manlalangoy luwas nga makatagamtam sa dugay na nga gipaabut nga pag-abli, lakip ang adlaw-adlaw nga pagsulay sa polusyon sa tubig ug pagpatuman sa usa ka pagsulay sa paglangoy alang sa mga naligo.
Ang mga swimming spot bukas hangtod Agosto 31.
